ကျနော့်ဆီမေးထားတာတော့ တော်တော်ကြာပြီ။ မအားလို့ စာမကြည့်အားတာနဲ့ ပြန်မဖြေဖြစ်တာ ခုလောက်ဆို ရောင်းတောင်ပြီးလောက်ပြီထင်ပါရဲ့။ ဒါပေမယ့် အချည်းနှီးတော့ မဖြစ်ပါဘူး။ သူ့ကိုအကြောင်းပြုပြီး တခြားသူတွေမှာလည်း ဒီလိုအခက်အခဲတွေကြုံလာတဲ့အခါ ဘယ်လိုဖြေရှင်းနိုင်မလဲဆိုတာသိခွင့်ရသွားတာပေါ့။ 


ရောင်းချင်တာက အိမ်ဆိုပေမယ့် တကယ်တမ်းမှာ အိမ်ဆိုတဲ့အရာက အမျိုးမျိုးရှိနိုင်ပါတယ်။ ဥပမာ...


ပျဥ်ထောင်အိမ်ကို အိမ်လို့ အလွယ်ခေါ်နိုင်ပါတယ်။

ဒါပေမယ့် အုတ်တွေနဲ့ဆောက်ကြတော့ တိုက်လို့ခေါ်ကြပြန်တယ်။

ဓနိမိုး၊ ဓရံကာပြီး သေးငယ်တဲ့အိမ်တမျိုးဟာ တဲလို့ခေါ်ကြပြန်ရော...


ဒါတွေက ဗေဒင်ဆရာတစ်ယောက်အတွက် အရေးမကြီးဘူးလို့ထင်ရပေမယ့် ကိုယ်တကယ်ဓာတ်ဆင်ချင်တဲ့အခါ အဲ့ဒါတွေရဲ့ သဘောက အရေးကြီးလာပါတယ်။ ပမာပြောရရင်... ခဲတံကို လက်နဲ့အလွယ်တကူချိုးနိုင်ပေမယ့် အတော်အတန်ကြီးမားတဲ့ သစ်ကိုင်းကိုတော့ အတော်အတန်အားစိုက်ချိုးမှရတတ်ပါတယ်။ ခဲတံလည်း သစ်သား၊ သစ်ကိုင်းလည်း သစ်သားလို့ ရမ်းပြောလို့မရပါဘူး။ ဒီလိုပဲ ဓာတ်ဆင်တဲ့အခါ ( ဓာတ်ဆင်လို့ပဲရေးလိုက်ပါတယ်။ တကယ်က ရေးချင်တဲ့စကားလုံးက တစ်ခုပါ... ဇူဇူရဲ့ AI က မထင်ရင် မထင်သလိုလုပ်တတ်လွန်းလို့ တခြားနည်းနဲ့ရေးလည်း ရပေမယ့် စကားလုံးရှောင်တဲ့နည်းပဲ သုံးလိုက်ပါတယ်။ စာအရေးအသား ပေါ့ဆသလိုဖြစ်သွားရင် နားလည်ပေးပါ။ ) ကိုယ်ဓာတ်ဆင်ရမယ့် ပစ္စည်းရဲ့ သဘာဝကို သိထားဖို့လိုအပ်ပါတယ်။ သာမန်သေးငယ်တဲ့အရာကို ကြိုက်သလိုဓာတ်ဆင်နိုင်ပေမယ့် ကြီးမားတဲ့အရာမျိုးကို ဓာတ်ဆင်တဲ့အခါ ကိုယ်ဆင်ရမယ့် ဓာတ်ပစ္စည်းစွမ်းအားက သေးငယ်နေလို့မရတတ်ပါဘူး။ 


အိမ်ဆိုတဲ့အမျိုးဟာ မြေကြီးပေါ်မှာ အခိုင်အမာတည်ဆောက်ထားရပြီး ပြောင်းဖို့ ရွေ့ဖို့ ခက်တဲ့အရာတမျိုးလို့ အရင်ဆုံးနားလည်ထားလိုက်ပါ။ ဒါဆို ဓာတ်ဆင်တဲ့အခါ ဘယ်လိုဆင်ရမလဲဆိုတဲ့အတွေးကို အထောက်အပံ့ရစေပါတယ်။ ကြီးမားတဲ့ ကျောက်တုံးကို တွန်းချဖို့... လူရဲ့လက်နဲ့လား၊ လူအများရဲ့ခွန်အားနဲ့လား၊ ဆင်နဲ့လား... ဘာနဲ့တွန်းချသင့်သလဲ? ... စသဖြင့် စဥ်းစားတာနဲ့ဆင်တူပါတယ်။ 


ပြီးတော့ ဓာတ်ဆင်တဲ့ပညာမှာ အင်္ဂဝိဇ္ဇာက နာမည်ကြီးပါတယ်။ အဲ့ဒီပညာကိုသုံးမယ်ဆိုရင် နံကို ကွဲကွဲပြားပြား ခွဲခြားသိနေဖို့လည်း အထူးအရေးကြီးပါတယ်။ ဥပမာ... အိမ်ဆို... တနင်္ဂနွေနံ၊ တိုက်၊ တဲ ဆို စနေနံ စသဖြင့်ယူခြင်းမျိုးပေါ့။ ပြီးတော့ ဒီပညာမှာ အသုံးပြုနိုင်တဲ့နည်းလမ်းတွေအများကြီးရှိပါတယ်။ ဥပမာ... ဆပွတ်ဓာတ်နည်းလမ်း၊ ပဥ္စပွတ်+ဆပွတ်နည်းလမ်း၊ မိတ်ရန်ဓာတ်နည်းလမ်း စသဖြင့်ပေါ့။ ဒါပေမယ့် ဒီပညာကို ခြေခြေမြစ်မြစ် နားမလည်ပဲ သူများပြောစကားနဲ့တော့ ရမ်းမလုပ်သင့်ပါဘူး။ ခိုက်စရာရှိရင် ကိုယ်ကိုယ်တိုင်နဲ့ ကိုယ့်မိသားစုဝင်တွေကနေ စတင်ခိုက်တတ်လို့ပါ။ ဥပမာ... ဆပွတ်နည်းလမ်းဟာ အင်မတန်စွမ်းပါတယ်။ သို့သော် သူက အနိုင်ဓာတ်၊ အနှိမ်ဓာတ်သဘာဝဖြစ်ပါတယ်။ နေရာတကာ ဆပွတ်ချည်းသက်သက် သုံးစွဲလွန်းရင် မသင့်တဲ့နေရာမှာ စတင်ခိုက်တတ်ပါတယ်။ လက်တွေ့သိချင်... လက်တွေ့စမ်းပေါ့ဗျာ... ကျနော်က စာစကားနဲ့တင် ယုံကြည်တတ်တဲ့လူမျိုးမဟုတ်ပါဘူး။ အက်ဆစ်ချဥ်ပါတယ်ဆိုတာတောင် ဘက်ထရီအိုးထဲက အက်ဆစ်ကို လျှက်ကြည့်ပြီးမှ လက်ခံတတ်တဲ့လူမျိုးပါ။ 


နောက်ဆုံးတချက်သိရမှာက... ကိုယ်ဖြစ်စေချင်တဲ့အရာ... ဥပမာ အိမ်ရောင်းထွက်ချင်တယ်ဆို အိမ်ပေါ့ဗျာ... အဲ့ဒါကို ဘယ်လို ဓာတ်ဆင်မလဲ... ဘာကအဓိကလဲ..ဆိုတာမျိုးကို ချိန်ဆဖို့လိုအပ်ပါတယ်။ ဥပမာနဲ့ ရှင်းပြရရင်... အိမ်ဆိုပါစို့... 40x60 မြေကွက်ပေါ်မှာ 10 ပေပတ်လည်ဆောက်ထားတဲ့အိမ်မျိုးဟာ အိမ်ကိုသွားပြီး အဓိကထား ဓာတ်ဆင်လို့မရတတ်ပါဘူး။ ရောင်းချင်တာက အိမ်လို့ပြောလာပေမယ့်လည်း ​မြေကွက်ကသာ ပိုကြီးပြီး အိမ်ထက်အင်အားကောင်းနေလို့ မြေဆိုတဲ့ ပညတ်ကိုယူပြီး ကြာသပတေးနဲ့ ဓာတ်ဆင်မှသာ အဆင်ပြေစေပါတယ်။ စက်ရောင်းချင်တယ်ဆိုကြပါစို့... တိတိကျကျဖြစ်အောက် မီးစက်ပဲ ထားဗျာ... မီး.. မ နဲ့ စလို့ ကြာသပတေးသွားမလုပ်နဲ့ဦးနော်... စက်ကစက်ပဲ... အင်္ဂါနံယူပြီး ဓာတ်ဆင်မှရမှာ... ဒါပေမယ့် အဲ့ဒီစက်က ကိုယ့်အပိုင်မဟုတ်ပဲ... ဘိုးဘွားပိုင်ဖြစ်နေတယ်ဆိုပါစို့ ( အမှန်တော့ ဘိုးဘွားပိုင်စက်ရယ်လို့ မရှိပါဘူး... ကိုယ့်လက်ထဲကစက်ဟာ ကိုယ့်စက်ပါပဲ... သဘောတရားကိုရှင်းပြလိုလို့ ပမာပေးခြင်းသာဖြစ်ပါတယ်။ ) ဘိုးဘွားပိုင်စက်ဆိုရင် ကိုယ့်အပြင် တခြားသူတွေပါ ပိုင်ဆိုင်နေတာမျိုးရှိလာတတ်ပါတယ်။ ဒီလိုအချိန်မျိုးမှာ ရမ်းသမ်းပြီး စက်ရောင်းထွက်အောင် လုပ်မရတတ်ပါဘူး။ တခြားသူတွေရဲ့ ရောင်းမထွက်စေတဲ့ ကံတချို့ကြောင့်ဖြစ်ပါတယ်။ 


တကယ်တမ်းပြောရရင်... ဓာတ်ဆင်တယ်ဆိုတာ ထင်သလောက်မလွယ်ကူပါဘူး။ တချို့ ကျနော့်ဆီ အလွယ်ပဲ ယတြာတွေ၊ အစီရင်တွေလာတောင်းကြတယ်။ သူတို့ရဲ့စိတ်ထဲမှာ ဒီအစီရင် လုပ်ရင် ရပြီလို့ပဲ လွယ်လွယ်တွေးနေတတ်ကြပါတယ်။ ဘယ်သူမှ ငါ့ကံက ငွေအလုံးအရင်းနဲ့ရော ဝင်ကိန်းရှိရဲ့လား၊ ငါ့ကံက မမျှော်လင့်ပဲ ငွေများများဝင်လာရင် ဘာဖြစ်တတ်သလဲ၊ ငါ့ကံမှာရော အိမ်ရောင်းထွက်ကိန်း တကယ်ရှိရဲ့လား စသဖြင့်တွေ မတွေးမိတတ်ကြပါဘူး။ တကယ်တော့ ဒါဟာ လိုအပ်ချက်တခုဖြစ်ပါတယ်။ အဲ့ဒီလိုအပ်ချက်ကို ကျကျနနမသိပဲ ရမ်းလုပ်ရင် အစီရင်တွေက မအောင်မြင်တဲ့အပြင် ပြန်ခိုက်တတ်ပါတယ်။ ခိုက်လို့ ခိုက်မှန်း သတိမထားမိတတ်ကြတော့ လူအများဟာ ပေါ့ပေါ့ဆဆပါပဲ.... တကယ်တမ်းဖြစ်သင့်တာက ဆရာလုပ်သူနဲ့ သေချာတိုင်ပင်၊ ဆရာကလည်း လိုအပ်ချက်တွေကို သိအောင်လုပ်။ ပြီးမှဓာတ်ဆင်ဆိုတာမျိုးပါ။ မဟုတ်ရင်တော့ ကျနော်တို့ဟာ ပျမ်းမျှသဘောတရားကိုသာ ခန့်မှန်းပြီး အစီရင်တွေ၊ ယတြာတွေကို ပေးနိုင်ပါလိမ့်မယ်။ 


ဥပမာ... အိမ်ရောင်းချင်တယ်ဆို... ဘာလုပ်၊ ဘာလုပ်ပေါ့... ( ဘာအိမ်အမျိုးအစားလဲ... အိမ်ကအဓိကလား၊ မြေကအဓိကလား၊ ဒါမှမဟုတ် ရောင်းချင်နေတဲ့ လူရဲ့ကံက အဓိကလားဆိုတာမျိုး မပါ ) 


ဒီလို ပျမ်းမျှသဘောနဲ့ ပေးလိုက်ရတဲ့ ယတြာ၊ အစီရင်တိုင်းဟာ မုချစွမ်းရမယ်လို့ အာမခံလို့ မရတော့ပြန်ပါဘူး။ ( သေသေချာချာတွက်ချက်ပြီးမှ ပေးရတဲ့ အစီရင်မျိုးတောင် ရံခါ မစွမ်းတတ်တဲ့ သဘောရှိပါတယ်။ ) ဒီတော့ ပျှမ်းမျှပေးရတဲ့ အစီရင်တွေရဲ့သဘောက မိတ်ဆွေရဲ့ကံဟာ မပြောပလောက်ဘူး။ တိုက်ဆိုင်မှုလည်းရှိမယ်ဆိုရင် စွမ်းတတ်ပါတယ်။ မဟုတ်ရင် မစွမ်းတဲ့အပြင် ပေးတဲ့ဆရာကပါ အသုံးမကျရင် ပြန်ခိုက်တတ်ပါတယ်။ ဒါကြောင့်လည်း ကျနော် လိုင်းပေါ် စာတင်ပြီဆိုရင် ဘေးမဖြစ်အောင် ကြိုတင်စဥ်းစားပြီးမှ ပေးရပါတယ်။ မသိလို့ အားကိုးတကြီး လုပ်ပါတယ်ဆိုကာမှ ကိုယ်က ခိုက်အောင်လုပ်မိရင် ဝဋ်က ချက်ချင်းလိုက်ပါတယ်။ ပေးတဲ့ဆရာကို အရင်ဒုက္ခပေးတတ်ပါတယ်။ ခုလည်း ဘယ်လောက် အရောင်းခက်နေနေ မြန်မြန်ရောင်းထွက်စေမယ့် အိမ်ရောင်းနည်းကို ကျနော်မျှဝေမှာပါ။ ဒီအထိ ရှင်းပြထားတဲ့အတွက် မိတ်ဆွေရဲ့ လိုအပ်ချက်တွေကို အတန်အသင့် သဘောပေါက်လောက်မယ်ထင်ပါတယ်။ ပြီးတော့ ပျမ်းမျှသဘောနဲ့ ဘေးမရှိအောင် ပေးရတဲ့ ယတြာအမျိုးအစားဖြစ်ကြောင်းလည်း နားလည်ထားစေချင်ပါတယ်။ တိတိကျကျလုပ်ချင်ရင်တော့ ကျနော့်ဆီမှာ ဥာဏ်ပူဇော်ခပေးပြီး တိုင်ပင်ပေါ့ဗျာ... တွက်ချက်ရမှာတွေ၊ ဆွေးနွေးရမှာတွေက ကျနော့်ရဲ့အချိန်တွေကို ဖဲ့ပေးရမှာမို့ အလကားတော့ အချိန်အကုန်မခံနိုင်ပါဘူး။ ဒါက ကျနော့် သဘောထားပြောပြတာပါ။ ကျနော့်အပေါ် ကျေးဇူးရှိထားသူတွေအတွက်ကတော့ ချွင်းချက်ပေါ့။ 


ကဲ... အစီရင်စမယ်... နို့ဆီခွက်တခုရအောင်ရှာ၊ ရှာမရရင် မလုပ်နဲ့။ ရပြီဆိုရင် အဲ့ဒီခွက်ထဲကို ခင်ဗျားရောင်းချင်နေတဲ့ အိမ်ရဲ့လိပ်စာအပြည့်အစုံကို စာရွက်ပေါ်မှာရေးပြီးထည့်။ ပြီးရင် ရောင်းချင်တဲ့ အိမ်ရဲ့ ထောင့်လေးထောင့်က မြေကို အနည်းငယ်စီယူပြီး နို့ဆီခွက်ထဲထည့်။ ခန့်မှန်းချေအားဖြင့် ထောင့်လေးထောင့်မြေစုစုပေါင်းဟာ နို့ဆီခွက်ရဲ့ သုံးပုံ နှစ်ပုံလောက်ဆို ရပြီ။ ပြီးရင် အဲ့ဒီခွက်အလယ်မှာ အမွှေးတိုင် ၇ ချောင်းစိုက်။ မီးလုံးဝမထွန်းနဲ့။ အမွှေးတိုင်စိုက်ထားရုံပဲ။ အစီရင်က ဒါပဲ။ ခွက်ကို ရောင်းချင်တဲ့ အိမ်ရဲ့ ဘုရားစင်အောက်မှာ ခုံလေးတစ်လုံးနဲ့ တင်ပေးထားရင် ပိုကောင်းတယ်။ တကယ်လို့ ရောင်းချင်တဲ့အိမ်က လူငှားတင်ထားချိန်မို့ လုပ်ဖို့ အဆင်မပြေဘူးဆိုလည်း ကိုယ်လောလောဆယ်နေတဲ့ အိမ်မှာလုပ်လည်း ရတယ်။ ဒီအစီရင်ကို ဘယ်သူမဆို အင်္ဂါ၊ စနေ တနေ့နေ့ရဲ့ မွန်းလွဲ ၁၂ နောက်ပိုင်းမှာလုပ်ပေးလို့ရတယ်။ တခုသတိပြုရမှာက တခါတရံ... ကိုယ်ရောင်းချင်တာက အိမ်လို့မခေါ်ထိုက်တဲ့ အလွှာတိုက်ခန်းမျိုးတွေလည်းဖြစ်နေတတ်တယ်။ ဒါဆို မြေကြီးယူဖို့ခက်နိုင်တယ်။ ဒီတော့ ဓာတ်မိအောင်လုပ်ဖို့က ပန်းအိုးစိုက်ထားရင် ပန်းအိုးထဲကမြေကိုယူ... မစိုက်ထားရင် မြေကြီး၊ သဲ ရနိုင်တဲ့နေရာက မြေ၊ သဲကို ခွက်လေးခုနဲ့ခွဲပြီး ရောင်းချင်တဲ့တိုက်ခန်းရဲ့ ထောင့်လေးထောင့်မှာ ၁ ပတ်ထားပြီးမှ အဲ့ဒီမြေကို သုံးလည်းရတယ်။ 


အခုပြောပြခဲ့တာတွေက နည်းလမ်းတွေပါ။ သင်ခန်းစာမဟုတ်လို့ တချို့အချက်တွေတော့ ရှင်းမပြတော့ပါဘူး။ အင်္ဂဝိဇ္ဇာအစီရင်ပညာကိုတော့ သက်ဆိုင်ရာ သင်တန်းမှာလေ့လာနိုင်ပါတယ်။