အနောက်တိုင်းလောကီပညာကို စိတ်ဝင်စားတဲ့ညီငယ်တစ်ယောက်က အထက်ပါအတိုင်း မေးထားပါတယ်။ ဒီမေးခွန်းရဲ့အဖြေကို တခြားဝါသနာပါတဲ့ လူငယ်တွေလည်း ဖတ်ရှုနိုင်အောင် ဒီကနေပဲ အခြေခံကျကျရှင်းပြပေးပါမယ်။

Occult ပညာရပ်ကို လေ့လာလိုက်စားဖို့အတွက် လိုအပ်တဲ့ အရည်အချင်းတွေကတော့ အောက်ပါအတိုင်း ဖြစ်ပါတယ်။


စိတ်ပိုင်းဆိုင်ရာ အရည်အချင်းများ

==============================

( ၁ ) စိတ်ဝင်တစား လေ့လာလိုစိတ် (Curiosity)

Curiosity ဆိုတာကို "သိလိုတတ်လိုစိတ်ပြင်းပြမှု" လို့ဘာသာပြန်လို့ရပေမယ့် ကျနော် အထက်ပါအတိုင်းပဲ သာသာပြန်လိုက်ပါတယ်။ Occult ပညာရပ်ဟာ နက်နဲတဲ့ အကြောင်းအရာတွေနဲ့ ပြည့်နှက်နေတာကြောင့် စိတ်ဝင်တစားနဲ့ စူးစမ်းလေ့လာလိုစိတ် ရှိဖို့ အရေးကြီးပါတယ်။ စိတ်ဝင်စားမှုမရှိပဲ ပေါ့ပျက်ပျက်နဲ့လေ့လာမယ်ဆိုရင် ပညာတပိုင်းတစနဲ့ ဟိုမရောက်၊ ဒီမရောက်ဖြစ်သွားတတ်ပါတယ်။ ဒါကို ကျနော်က "မျောက်သစ်ကိုင်းလွတ်ခြင်း" လို့ နာမည်ပေးထားပါတယ်။ "မသိဘူးလားဆိုတော့ သိတယ်။ တကယ်သိသလားဆိုတော့ မသိပြန်ဘူး" ဆိုတဲ့အဆင့်ဟာ ဟိုမရောက်၊ ဒီမရောက်နဲ့ အပင်မှီမယ်ထင်ပြီး ဒီဘက်လက်ကိုလွှတ်ပြီး ခုန်ကူးကာမှ ဟိုဘက်အပင်လည်း မမှီ၊ ဒီဘက်ကအပင်ကိုလည်း လက်လွတ်သွားတဲ့ မျောက်ပမာ ဖြစ်သွားတတ်တာမျိုးကိုဆိုလိုတာပါ။ ကျနော့်စိတ်ကူးအရ ပညာတစ်ရပ်ကိုလေ့လာတဲ့အခါ ထဲထဲဝင်ဝင်လေ့လာတတ်တာမျိုးကိုသဘောကျပါတယ်။ သူများယောင်လို့ လိုက်ယောင်တာမျိုးကို မကြိုက်ပါဘူး။ ဥပမာ... ဆော်လမွန်ဘုရင်ကြီးရဲ့ အဆောင်တွေသိသလားမေးရင် Occult ပညာလေ့လာထားဖူးသူတိုင်းက သိပ်သိတာပေါ့... ဘယ်အဆောင်ကဘယ်လို၊ ဘာကောင်းတာ... စသဖြင့် အာဘောင်အာရင်းသန်သန်နဲ့ ပြောပြမယ့်လူများပါတယ်။ ကောင်းပြီ.. ဒါဖြင့် အဲ့ဒီအဆောင်တံဆိပ်တွေထဲမှာ.... လှေကားထစ်ပုံတံဆိပ်လေးပါတယ်။ အဲ့ဒါဘာကိုဆိုလိုတာလဲ မေးရင်... အိုးတို့အတဖြစ်ကုန်တတ်ပါတယ်။ ဒါဟာ ဒီပညာကို လေ့လာနေပေမယ့် စိတ်ဝင်တစားမရှိသေးဘူးလို့ အဓိပ္ပါယ်ရပါတယ်။ ပညာရှင်ဆိုတာ ပညာတွေကို အမြဲရှင်သန်နေအောင်ပြုမူထားသင့်ပါတယ်။ သင်ယူတဲ့အခါ မလောရပါဘူး။ လောလိုက်ရင် တိုးတက်မှု နှေးကွေးသွားပါတယ်။ ပြီးတော့ သူများရေးထားပြီးသားအကြောင်းအရာလောက်ကိုသာ နားလည်ထားပြီး ကိုယ်တိုင်က ဘာမှနားမလည်ဘူးဆိုတာမျိုးလည်း မဖြစ်သင့်ပါဘူး။ ဒီလိုလူမျိုးတွေကို ကျနော်က "ဝင်ကစွပ်" ကောင်လို့ နာမည်ပေးထားပါတယ်။ ဝင်ကစွပ်လေးတွေဟာ ခရုခွံတွေကို သူ့တို့အိမ်အမှတ်နဲ့သာ နေထိုင်တတ်ကြပါတယ်။ ခရုခွံထဲရောက်နေလို့ ခရုလားဆိုတော့လည်း ခရုမဟုတ်ပြန်ပါဘူး။ ဒီလိုပဲ သူများရေးထားတာလောက်နဲ့ တင်းတိမ်နေပြီး ကိုယ်တိုင်က ဘာတစ်ခုမှ နားမလည်သေးရင် နားလည်အောင်လုပ်ထားပါ။ မဟုတ်ရင် ပညာရှင်တွေကြားမှာ ကိုယ်က မျက်နှာငယ်သွားတတ်ပါတယ်။ ကိုယ်မတတ်တာ ဘယ်သူသိလို့... ဆိုပြီး ဟန်ကိုယ့်ဖို့ လုပ်မနေပါနဲ့... ဘယ်သူသိသိ၊ မသိသိ... ကိုယ့်ဟာကိုယ်တော့ သိနေတဲ့အတွက် တသက်လုံး လိပ်ပြာမလုံဖြစ်တတ်ပါတယ်။ အဆိုးဆုံးကတော့ ဒီပညာနဲ့များ ဥာဏ်ပူဇော်ခပေးပါ သွားလုပ်လို့ကတော့ ပူဇော်ခံအဆင့်မဟုတ်လို့ အပူတွေစားမိသလိုဖြစ်ပြီး လုံးပါးပါးတတ်ခြင်းပါပဲ။ သတိပြုပါ။ 


( ၂ ) စိတ်ရှည်မှု ( Patience )

==========================

ဒီနေရာမှာပြောချင်တဲ့ စိတ်ရှည်မှုဆိုတာက လောမကြီးဖို့၊ စောင့်ဆိုင်းတတ်ဖို့ဆိုတဲ့ စိတ်မျိုးပါ။ Occult ပညာရပ်ကို တတ်မြောက်ဖို့အတွက် အချိန်ယူ လေ့လာဖို့ လိုအပ်ပါတယ်။ သိပ္ပံပညာမျိုးမဟုတ်တဲ့အတွက် ရံခါ စမ်းတဝါးဝါးအခြေအနေတွေနဲ့လည်း ကြုံချင်ကြုံလာတတ်ပါတယ်။ ဆရာအနားမှာမရှိရင် အချိန်တခုပေးပြီး လေ့လာရတာမျိုး၊ စောင့်ကြည့်ရတာမျိုးတွေလည်း ရှိနိုင်ပါတယ်။ နောက်တခုက အလိုလောဘ တအားကြီးလွန်းရင်လည်း ပညာငုပ်သွားတတ်ပါတယ်။ ဒါကြောင့် စိတ်ရှည်ရှည်နဲ့ စနစ်တကျလေ့လာတတ်ဖို့ အရေးကြီးပါတယ်။


( ၃ ) စဉ်းစားဆင်ခြင်နိုင်စွမ်း ( Critical Thinking )

===========================================

Critical ဆိုတဲ့ စာလုံးကို ဒီနေရာမှာ "ဆန်းစစ်ဝေဖန်နိုင်သော၊ နှိုင့်ချင့်နိုင်သော" လို့ ဘာသာပြန်တာပိုကောင်းပါတယ်။ တနည်းပြောရရင်သော စဥ်းစားဆင်ခြင်နိုင်စွမ်း၊ ဒါမှမဟုတ် ဝေဖန်ပိုင်းခြားနိုင်စွမ်း လို့ပြောနိုင်ပါတယ်။ Occult ပညာရပ်မှာ ယုံကြည်မှုနဲ့ အသိပညာကို ခွဲခြားနိုင်ဖို့အတွက် စဉ်းစားဆင်ခြင်နိုင်စွမ်း ရှိဖို့ လိုအပ်ပါတယ်။ အဲ့ဒီဥာဏ်အားမထက်သန်ပဲ လိုက်စားတဲ့အခါ မထင်မှတ်တဲ့ အမှားတွေကိုပြုမူမိတတ်ပြီး အကျိုးမရှိတဲ့ ဖြစ်ရပ်တွေနဲ့ နိဂုံးချုပ်သွားတတ်ပါတယ်။


( ၄ ) ရိုးသားမှု ( Honesty )

========================

ရိုးသားတဲ့သူကို လူတိုင်းက ချစ်ခင်တတ်ကြသလိုပဲ... ပညာရပ်ကလည်း ရိုးသားသူကို ပိုပြီး စောင့်လျှောက်ပါတယ်။ ရိုးသားတယ်ဆိုတဲ့နေရာမှာ တချို့က တခြားသူတွေအပေါ်သာရိုးသားတတ်ကြပြီး မိမိကိုယ်ကို မရိုးသားတတ်ကြပါဘူး။ တချို့ကတော့ မိမိကိုယ်ကိုသာ ရိုးသားပြီး တခြားသူအပေါ် မရိုးသားတတ်ကြပြန်ဘူး။ တချို့ကတော့ ဘယ်သူ့အပေါ်မှာမှ ရိုးသားမှုမရှိတတ်ကြတာပါ။ ခု ကျနော်ပြောနေတဲ့ ရိုးသားမှုဆိုတာကတော့ မိမိကိုယ်ရော၊ တခြားသူအပေါ်မှာ ရိုးသားမှုရှိဖို့လိုအပ်ပါတယ်။ ရိုးသားမှုဟာ လူ့အသိုင်းအဝိုင်းမှာ လူချစ်ဆေးတမျိုးဖြစ်သလို၊ ပညာအရာမှာလည်း ပညာစွဲမြဲစေတဲ့ ဆေးဖြစ်ပါတယ်။ ပညာလိုက်စားတာခြင်း တူတူ ရိုးသားသူဟာ အစစအဆင်ပြေသလောက် မရိုးသားသူဟာ အဆုံးသပ်မကောင်းတတ်ပါဘူး။ ဒါလည်း သတိပြုဖို့ပါ။


 ( ၅ ) ယုံကြည်မှု ( Belief )

=========================

ဝိဇ္ဇာပညာရပ်တွေဟာ စိတ်ကူးယဥ်ဆန်ပါတယ်။ သိပ္ပံပညာရပ်လိုမျိုး တိုင်းတာနိုင်တဲ့အရာ မရှိပါဘူး။ ဒီအတွက် ခိုင်မာတဲ့ ယုံကြည်ချက်မရှိရင် ဖြစ်မြောက်ဖို့ ခက်ခဲပါတယ်။ လူတစ်ယောက်ဟာ အထပ်နှစ်ဆယ်မြင့်တဲ့ မျှော်စင်ရဲ့ ဟိုဘက်ဒီဘက်ကို တန်းထိုးပေးထားလို့ ဖြတ်ကူးရဲဖို့ မသေချာပါဘူး။ စနစ်တကျလေ့ကျင့်ထားသူကတော့ တမျိုးပေါ့လေ။ ဒါပေမယ့် ပြောနိုင်တာတစ်ခုကတော့ အဲ့ဒီတန်းကိုပဲ မြေပြင်မှာချပေးထားပြီး ဖြတ်ကူးခိူင်းကြည့်ပါ။ လေ့ကျင့်မထားတဲ့သူတောင် အသာကလေး ဖြတ်ကူးပြနိုင်ပါလိမ့်မယ်။ အဲ့ဒါ ယုံကြည်ချက်ကွာခြားသွားတဲ့ ဥပမာပါ။ ပြုတ်မကျဘူးလို့ ယုံကြည်ရင် ပြုတ်မကျတော့ပါဘူး။ ပြုတ်ကျမယ်ထင်ရင်တော့ ပြုတ်ကျမှာပဲ။ ဒီနေရာမှာ ယုံကြည်မှုဆိုတဲ့ စကားလုံးရဲ့ အနှစ်သာရကို တလွဲမလုပ်သင့်ပါဘူး။ ကျနော့်မိတ်ဆွေတစ်ယောက် ဂိုဏ်းဆေးပေါက်ပြီး သူ့ကို ဘယ်မြွေမှ မကိုက်နိုင်တော့ဘူးလို့ အခိုင်အမာယုံကြည်ပါတယ်။ သူ့ဆေးက တကယ်လည်း စွမ်းပါတယ်။ သူလက်ဝါးပြလိုက်တာနဲ့ ဘယ်မြွေမဆို ဦးညွှတ်သွားရုံမက သူလိုသိလို ကစားပြနိုင်ပါတယ်။ ဒါပေမယ့် ကျနော်က ယုံကြည်မှုကို တလွဲဖြစ်စေပြီး ယုံကြည်မှု မလွန်ကဲသင့်ကြောင်း အကြံပေးပါတယ်။ သူကလက်မခံပါဘူး။ သူဆုံးတော့ မြွေကိုက်လို့ပါပဲ။ ဒီလိုဖြစ်သွားရတာက သူဟာ ဆေးစွမ်းအားကိုးပြီး ယုံကြည်မှုလွန်ကဲစွာနဲ့ အပျော်တမ်း မြွေဖမ်းအစွမ်းပြလွန်းနေလို့ပါ။ သူ့ဆရာက မြွေနိုင်သော်ငြား၊ မညှင်းပမ်းရလို့ စည်းကမ်းထုတ်ထားတာကို သူမေ့နေတာလည်းပါသလို၊ လောကသဘာဝအရ "ဝဋ်" ဆိုတာကိုပါ သူမေ့နေလို့ပါ။ ဒီတော့ ယုံကြည်မှုဆိုတာ စိတ်ဓာတ်ခိုင်မာမှုတမျိုးအဖြစ်သာ နားလည်ထားသင့်ပြီ လွန်ကဲတဲ့ မိုက်ရူးရဲတာမျိုးတော့ မဖြစ်သင့်ကြောင်း သတိပြုသင့်ပါတယ်။


( ၆ ) စိတ်တည်ငြိမ်မှု ( Mental Stability )

====================================

 Occult ပညာရပ်ဟာ စိတ်ပိုင်းဆိုင်ရာ စိန်ခေါ်မှုတွေနဲ့ ရင်ဆိုင်ရနိုင်တာကြောင့် စိတ်တည်ငြိမ်မှု ရှိဖို့ လိုအပ်ပါတယ်။ စိတ်မငြိမ်မသက်ဖြစ်တာတွေ၊ မိမိစိတ်ကို အစိုးမရတာတွေဟာ ပညာပိုင်းကို အများကြီး ပြဿနာပေးတတ်ပါတယ်။ စူးစူးစိုက်စိုက်နဲ့ တည်ငြိမ်တဲ့စိတ်ရှိမှ လုပ်သမျှအလုပ်တွေက ဖြစ်မြောက်တတ်ပါတယ်။ 


အသိပညာပိုင်းဆိုင်ရာ အရည်အချင်းများ

==================================

( ၁ )အခြေခံ အသိပညာ ( Basic Knowledge )

=======================================

Occult ပညာကိုလေ့လာနိုင်ဖို့ အခြေခံအသိပညာ၊ ဗဟုသုတတွေရှိသင့်ပါတယ်။ ဒဿန၊ သမိုင်း၊ စိတ်ပညာနဲ့ သိပ္ပံပညာရပ်တွေကို အခြေခံအားဖြင့် သိရှိထားရင် ပိုကောင်းပါတယ်။ တချို့အရာတွေက သမိုင်းကြောင်းတွေနဲ့လည်း ချိတ်ဆက်ထားတတ်ပြီး ပဟေဠိဆန်တာတွေများစွာပါဝင်ပါတယ်။ ဒါတွေကို နားလည်ဖို့ အခြေခံအသိပညာရပ်တွေလိုအပ်ပါတယ်။


( ၂ ) ဘာသာစကား အသိပညာ ( Language Knowledge )

================================================

ရှေးဟောင်း စာပေတွေကို လေ့လာနိုင်ဖို့အတွက် ရှေးဟောင်း ဘာသာစကားတွေကို အခြေခံအားဖြင့် သိရှိထားဖို့ လိုအပ်ပါတယ်။ တချို့အကြောင်းအရာတွေက သာမန်အင်္ဂလိပ်စာတတ်မြောက်ထားရုံနဲ့ မရသေးပါဘူး။ ဝှက်စာတွေ၊ ဂမ္ဘီရစာတွေလိုမျိုးကိုပါ နှံ့စပ်အောင် အမြဲမမြတ် လေ့လာနေဖို့လိုပါတယ်။


( ၃ ) သုတေသန စွမ်းရည် ( Research Skills )

======================================

Occult ပညာရပ်မှာ အချက်အလက်တွေကို စနစ်တကျ ရှာဖွေနိုင်ဖို့အတွက် သုတေသန စွမ်းရည် ရှိဖို့ လိုအပ်ပါတယ်။ ဒီပညာမျိုးတွေက တစ်ခုထဲရှိနေတာမျိုးမဟုတ်ပဲ တစ်ခုထဲမှာတောင် နည်းလမ်းအမျိုးမျိုးနဲ့ ရပ်တည်နေတတ်ပါတယ်။ ကိုယ်က သာမန်လောက်လေ့လာနေတာဆိုရင် လျှို့ဝှက်ချက်ကို မြင်နိုင်ဖို့ မလွယ်ပါဘူး။ သုတေသနများများပြုမှ တနည်းအားဖြင့် မတူညီတာတွေကို ရှာဖွေလေ့လာပြီး နှိုင်းယှဥ်တတ်မှ ပိုတိုးတက်တတ်ပါတယ်။


တခြား အရည်အချင်းများ

=======================

( ၁ ) ကျင့်ဝတ် သိက္ခာ ( Ethics )

============================+

ကိုယ်ကျင့်တရားကောင်းဖို့လည်း လိုပါတယ်။ ဒီလိုပညာရပ်တွေဟာ ကိုယ်ကျင့်တရား ပျက်ပြားသူရဲ့လက်ထဲမှာ မရှိသင့်ပါဘူး။ အသုံးပြုတဲ့အခါမှာ ကျင့်ဝတ် သိက္ခာနဲ့အညီ အသုံးပြုဖို့ အရေးကြီးပါတယ်။


( ၂ ) အန္တရာယ်ကို သတိပြုနိုင်စွမ်း ( Awareness of Danger )

===================================================

Occult ပညာရပ်ဟာ အန္တရာယ်တွေနဲ့ ပြည့်နှက်နေတာကြောင့် အန္တရာယ်ကို သတိပြုနိုင်စွမ်း ရှိဖို့ လိုအပ်ပါတယ်။ ဆရာမရှိ၊ နည်းလမ်းမသိနဲ့ စမ်းတဝါးဝါးလုပ်ကြည့်ရင်းနဲ့ ပညာခိုက်ပြီး ဘဝပျက်သွားသူတွေအများကြီးရှိပါတယ်။ သိပ္ပံပေတံနဲ့ တိုင်းမရတဲ့ ဖြစ်ရပ်တွေများစွာရှိပါတယ်။ ကိုယ်အသုံးပြုမယ့် ပညာရဲ့ ဘေးထွက်ဆိုးကျိုးတွေကို ထိုးထွင်းဥာဏ်နဲ့ မြင်အောင်ကြည့်တတ်ဖို့လည်း အရေးကြီးပါတယ်။ 


( ၃ ) လမ်းညွှန်မှု ( Guidance )

===========================

Occult ပညာကို စတင်လေ့လာမယ့်သူဟာ အတွေ့အကြုံရှိတဲ့ ဆရာ၊ ဒါမှမဟုတ် လမ်းညွှန်ပေးနိုင်သူ ရှိဖို့ လိုအပ်ပါတယ်။ ကားကို တခါမှ မမောင်းဖူးတဲ့သူဟာ ကားမောင်းနည်းစာအုပ်ကို သူ့ရဲ့ လမ်းညွန်သူလို့ ထင်တတ်ပါတယ်။ စာအုပ်က တကယ်တမ်း လမ်းမညွှန်နိုင်ပါဘူး။ စာအုပ်က ပေးနိုင်တာ ဗဟုသုတလောက်သာဖြစ်ကြောင်း လက်တွေ့ကားမောင်းကြည့်ရင် သိနိုင်ပါတယ်။ Occult ပညာဟာ ကားမောင်းရတာထက် ပိုခက်ပါတယ်။ လမ်းညွန်မှုမရှိရင် အမှားသံသရာမှာ တဝဲလည်လည်နဲ့ မှားပြီးရင်း မှားနေတတ်ပါတယ်။ အမှားတွေကလည်း ချက်ခြင်းမသိရတဲ့အခါ မှားလို့မှားမှန်းမသိ... နောက်ဆုံး အိမ်ထောင်ကွဲပြဲသွားတာတောင်မှ ပညာခိုက်လို့ ခိုက်သွားမှန်း မသိကြတဲ့သူတွေ ဒုနဲ့ဒေးပါ။ ဒါတွေလည်း သတိပြုသင့်ပါတယ်။


ဒါတွေက လူတိုင်း နားလည်လွယ်အောင် အကျဥ်းအားဖြင့် ရှင်းပြပေးလိုက်တာပါ။ သင်တန်းမဟုတ်လို့ အကျယ်တဝင့် မရှင်းပြနိုင်တာကိုတော့ နားလည်ပေးပါ။ 


ကဲ... အားလုံးပဲ... ပညာရည်ပြည့်ဝပြီး ဗဟုသုတတိုးပွားကြပါစေဗျာ....